2014-1-14 12:23
sinta
地標戰射中柱兼輸波 本田黑到爆
AC米蘭喺今季意甲認真唔掂，上半季一直喺中游位置徘徊，歇冬後簽咗新兵本田圭佑諗住可以踢好啲，點知喺周日場聯賽好難睇咁輸畀隊護級分子薩斯索羅。A米喺先入兩球下最後輸3:4，本來已經宣佈咗季後離隊嘅教練艾基利始終都坐唔到季尾，會方已經喺周一宣佈將艾基利炒魷。估唔到本田處子戰，就係艾基利嘅告別戰。
[img]http://static.apple.nextmedia.com/images/apple-photos/apple/20140114/large/aa05_01_a.jpg[/img]
■由祖雲達斯借畀薩斯索羅嘅小將杜文尼高貝拉迪（中）上演大四喜，今季聯賽已入11球。路透社
[b]薩軍𡃁仔前鋒「大四喜」[/b]
AC米蘭喺歇冬後首戰3:0大破阿特蘭大，到周日作客出戰排名更低嘅薩斯索羅，後者今季雖然和過拿玻里同羅馬，但近況就相當差賽前連輸4場。A米呢場開局相當好，羅賓奴同巴洛迪利分別喺9同13分鐘各入一球。但不幸事件之後發生，薩斯索羅嘅19歲前鋒小將杜文尼高貝拉迪喺上半場連入3球，加埋換邊後兩分鐘佢再入一粒，令A米由領先兩球變落後兩球；雖然完場前蒙杜利禾入波追番球，但A米都係要輸3:4。副主席加利安尼有到場睇波，但未完場已經嬲到震走咗。
[img]http://static.apple.nextmedia.com/images/apple-photos/apple/20140114/large/14s5-007p.jpg[/img]
■本田圭佑意甲初登場，有同胞球迷專誠嚟到聖西路為佢打氣，同佢講多謝（Grazie）。路透社
[b]恩沙基施多夫爭位[/b]
A米踢完呢場，半季聯賽19場波只係贏5場得22分，成績絕對唔及格。教練艾基利賽後都冇晒癮，求其回應話冇壓力，我求大俠估佢自己當時都心裏有數；大權在握嘅「太子女」芭芭拉貝盧斯科尼，賽後已經講到明話形勢危急，係時候要變。果然AC米蘭喺第二朝就發表聲明，宣佈將艾基利辭退，球隊暫時由助教兼名宿泰索迪領軍。
據報A米係意屬想換曾經效力過球隊嘅荷蘭中場施多夫接任，不過佢目前仲效力緊巴甲保地花高，所以可能會先畀現時青年軍主帥、球員時代一樣效力過A米嘅恩沙基帶住隊波到季尾，有傳球會已經喺周一派咗人同呢位前意大利國家隊前鋒傾吓。呢個時候施多夫嘅經理人就走出嚟澄清，話佢同保地花高可以隨時解約唔使賠錢；兩大前A米球星邊個會執教鞭，仲要拭目以待。
講番本田圭佑，話佢係黑腳其實就唔多公平，呢位日本中場喺下半場中段先後備入替，嗰陣隊波已經輸到2:4。本田表現都叫做有板有眼，仲有次射門中柱唔入，就咁睇呢廿幾分鐘嘅演出，初步嚟講算係唔錯嘅收購，即管睇吓佢可唔可以幫A米走出低谷。
來源:蘋果日報網站