履歷唔夠難稱球王

上季玩完馬後炮，今季就做預言家，同大家一齊睇吓嚟緊周末有咩好睇。本周傾咩：蘇亞雷斯拍唔拍得住美斯同C朗？

歐洲金靴獎，之前5屆都等同西甲神射手獎，因為C朗、美斯、科蘭3位西甲神射手，都順利拎埋歐洲金靴獎；蘇亞雷斯暫時都叫有望打破緊𠵱個悶局，因為佢英超入球仲高過C朗，頂唔頂到最尾就好難講，但大膽講應該可以破埋舒利亞嘅單季入球紀錄。
咖喱話入波多就夠升格上球王級，小弟就認為阿蘇仲未去到𠵱個境界；無錯，阿蘇今季一直都好平穩，基本上除咗2月，紅軍領隊羅渣士將史杜列治推上最前，阿蘇改踢輔鋒，令佢有一陣子入球荒外，都保持高水準，難得俾羅渣士鬧完之後，插水情況都少咗。但要成為球王級，除咗入波都仲有好多嘢；紅軍始終有謝拉特喺度，激勵士氣𠵱啲工作，都係留俾𠵱位大隊長，阿蘇未能提升𠵱個層面，始終爭啲。
仲有要做球王，都要有基本球品同背景，C朗以前真係成個花花公子咁，不過佢背後團體真係出咗唔少力幫佢洗底，又做慈父又做好男友；阿蘇其實都有𠵱個條件，本身有個靚老婆，同非常可愛嘅囡囡，但以前嘅衰嘢真係太多，今季初仲要為咬人事件受刑。當然時間可以沖淡一切，阿蘇如果繼續行為良好，起碼可以吸引更多中立球迷。
最重要一樣，始終就係冠軍。比較國家隊成就，阿蘇勝過美斯、C朗㖭，起碼幫烏拉圭贏過美洲國家盃；但球會頂級錦標，只有幫阿積士贏荷甲，同幫利物浦贏聯賽盃，又未踢過歐聯，呢個「Resume」仲未夠照。如果要真正「升呢」，起碼拎番次英超！

[img]http://static.apple.nextmedia.com/images/apple-photos/apple/20140404/large/aa0704a.jpg[/img]
■效力利物浦期間，蘇亞雷斯僅為球會奪得聯賽盃。資料圖片


來源:蘋果日報網站